من ناگەمە
دوایین تەقینەوەی ئەستێرەو
دوایین ڕووناکی مانگ
من ڕێ ناگرمە
دوایین دڵۆپی کانی و
هەڵوەرینی گەلا
من چاوەڕێی بەهارێکم
لە دەشتێکدا
گوڵە مێلاقەیەک
بکەمە دیاری پەنجەکانت
من خۆ لە گزنگی خۆر و
برووسکەی هەور ناشارمەوە
من ڕێگا لەگەڵ گێژەڵووکەو
فڕینی باڵندەکان ناگرم
چاوەڕێی
شەبەقێکم
ئاسمانی دڵم بگرێتەوە
من ناتوانم
دوایین بەفری ترۆپکی هیواو
جریوەی سێرووی ئەوینت بەدیاری بۆ بێنم
تەنیا دەتوانم
دڵێک و
چەن دڵۆپە فرمێسک و
کۆتا ڕووناکی چاوکانمت بۆ بێنم.
زانا شەریفیان
پێڵاوەکانی بەسەر شوستەو شەقامەکان دەساوی چەن پڕ بوون لە هیلاکی پڕ بوون لە یادگاری جێ پێکان .
لە هیچ شوێنێک نە خۆی دەگرت و نە وەخۆیان دەگرت هەر کات لە شوێنێکی بازاڕەکەدا پەیدات دەکرد .
فەرغوونەکەی مجۆعمەیەکی لەسەر دانابوو بڕێ خورمای لەسەر هەڵ ڕشتبووە و یەک دوو پووش خورمای لە ژێر مجۆعمەکە دانابوو، پاڵی تێوە دەنا ئەم سەرەو سەری بازاڕی دەکرد.
دوای ئەوەکە لەلایەن شارەوانیەوە تەرازووەکەیان لێ بردبوو یەکێ لە دەستیەکانی بە پاتۆڵەیەکەیەوە نابوو.
هاوارەکەی، دەنگی خڕەی تەرازووی بەر پشتووێنەکەی، موسیقای دەڵتەنگی و برسێتی منداڵەکانی دەوتەوە ، باوک مردووی دەرکراوی شەقامەکان بوو ،
زەکات گری خێرات خۆری براکانی بوو .
چەن دوژمنی سوورە تاوی نیمەڕۆ بوو ، چەن ناسراوی سێبەری دیوارەکان بوو .
نەیدەزانی ئێوارانی خۆش دەوێت یان زۆری قین لێیە ،
گوێکانی بەدوای دەنگی الله اکبری مزگەوتەکان دەگەڕا کە دەیبیست پڕی دەکرد لە سڕ بوون .
هاواری دەکرد وەرن بۆ خورما ،خورمای بەربانگە .
چاوەکان پڕ بوون لە قێز وبێز کە سەرەنجیان دەدا ، دەیانبرد بۆ قووڵایەکانی تاریکی نامرۆڤایەتی .
بۆ قومە ئاوێک چووە دووکانەکەی پاڵی هەر کە شێرە ئاوەکەی بەرداوە خاوەن دووکانەکە هاواری کرد
_چیە ئەوە بەڕۆژوو نیت ؟! تێح داوەشی ، کاسبیش بە ڕەمەزانەوە دەکات "وەرن بۆ خورمای بەربانگ" .
_بۆ تۆ ڕۆژووت گرتە بووی بە چی ؟ دوای ئەوەش بە ئاو ناشکێ من تەنیا ئاوم خواردە حاشا لە تیکەیەک نان.
_دەک به قوڵپەی زووخاوت بێ زمانت پای گرتە دا بچۆ دەرەوە.
_کاکە لەسەر زگی تێر قسە دەکەی ، ئەو خوایەت پێت نایەژێ بەشەماڵ خواردن تاوانی هەیە؟! نەی وتە کە ئێمە هەموومان دەمرین پێش ئەوەی دوایین هەنگاومان بنەین؟! هەر دەبێ دەمت بە قوتەوە بگری؟
من لەدوای مردنی باوکمانەوە بەڕۆژووم.
کاکە من خوایەکم هەیە ڕۆژێ لە گریانی مناڵەکەمەوە دەنگی دەربڕی بە چاوەکانی ژنەکەمە هاتە خوارەوە پێی وتم ڕۆژوو بە ئاو ناشکێ.
زانا شەریفیان
کورتیلە چیرۆکی " سێ بەری دار "
کە دی کتێبێکی لە کۆشی نابوو قەیتانی کەوشەکانی دەبەست.
لێی پرسی :
_بۆکوێ دەچی؟
_وتی دەچم لە بن سێبەری دارەکەم ئەم کتێبە تەواوکەم.
کە تاو گەڕا ڕەش و شین دۆزیانەوە.
زانا شەریفیان
"هاڵاو"
_بۆ کوشتت؟
_جیکە جیکی زۆر دەکرد،بە دەنگە دەنگ ناڕاحەتم.
_خۆ زۆرن لە حەوشەکەتان دەنگیان لێوە دێت؟
_ئەوان لە بەرچاوی هاوسێکانن،ئەوەی هاتبێتە حەوشە دیویانی.
_دەی ئەمیشت نیشانیان دایێ بۆ دەت کوشت؟
_هەرچیم کرد کەس نەیدی کە پێیدا هەڵبڵێ،خۆشی هیچکات نەیتوانی باسی من کات.
_خۆ ناتوانێ قسە کات؟
_تاوانی خۆیەتی.
_بۆ سووتاندت؟
_ئاخر منداڵێکی هاوسێمان دیبووی هەواڵی لە دایکی دەپرسی،هەرچیم کرد زیندوو نەبۆوە بۆ ئەوە ئاسەواری نەمێنێ سووتاندم.
_لە "با" ناترسی هەواڵی بەرێ؟
_ "با" ئەی هاوار بێژی خەڵک بێژن چی؟
زانا شەریفیان
